Inflashon Karibe Hulandes mas haltu na Sint-Eustatius

Den promé kuartal di 2011 e inflashon na Sint-Eustatius tabata 6,4 porshento. Esaki tabata mas haltu ku riba e otro dos islanan den Karibe Hulandes. Na Saba e inflashon tabata 4,1 porshento i na Bonaire 3,7 porshento. 

Inflashon Karibe Hulandes, promé kuartal 2011

“Horeca” i transporte konsiderablemente mas karu na Sint-Eustatius

Na Sint-Eustatius mas bien e “horeca” a bira mas karu. Preisnan den e cafénan, restorantnan i hotèlnan a subi ku mas ku 21 porshento  den e promé kuartal, kompará ku e mesun periodo den e aña anterior. Tambe transporte a bira mas karu i a subi ku kasi 17 porshento den preis. E preisnan di kuminda i bebidanan sin alkohòl na Sint-Eustatius a subi ku 5,7 porshento mas lihé ku na Bonaire i Saba.

Na Saba tambe preisnan den “horeca” konsiderablemente mas haltu

Tambe na Saba e preisnan den “horeca” a subi konsiderablemente. Na e isla mas chikí di Karibe Hulandes, den e tres promé lunanan di 2011 konsumidónan a paga kasi 21 porshento mas tantu na establesimentunan di “horeca”. Pa transporte mester a paga kasi 9 porshento mas tantu, kompará ku un aña promé.    

Paña mas karu na Bonaire

Na Bonaire, e isla mas grandi di Karibe Hulandes, e preisnan di paña i sapatu a subi si mas tantu, ku  kasi 13 porshento. Preisnan den “horeca” i di transporte tambe a subi, pero ménos ku na e otro dos islanan. Di otro banda e preisnan di kuido i komunikashon a subi na Bonaire mas tantu ku na Sint-Eustatius i Saba.