Ménos inflashon na Hulanda Karibense den promé kuartal di 2012
Den e promé kuartal di 2012, inflashon riba e islanan di Hulanda Karibense tabata bastante mas abou ku den e kuartal anterior. Esei tabata debí ku den promé kuartal di 2012 preisnan a subi na un manera muchu ménos drástiko ku den promé kuartal di 2011. Inflashon tabata mas haltu na St.-Eustatius (6,6 porshento), i mas abou na Boneiru (3,6 porshento).
Inflashon mas abou na Boneiru debí na preis di transporte, paña i horeca
Na Boneiru, inflashon pa promé kuartal di 2012 a bin kaba na 3,6 porshento. Den e último kuartal di 2011 sí e tabata 6,3 porshento ainda. E bahada di inflashon den promé kuartal di 2012 ta debí ku e preisnan di transporte, paña i hóreka a subi na un manera ménos drástiko.
Den e promé kuartal di 2012, transporte tabata 2,6 porshento mas karu ku un aña promé. E kuartal anterior, ainda e tabata na 7,2 porshento. Paña a bira 2,2 porshento mas karu den e promé kuartal di 2012 (10,4 porshento den e di kuater kuartal di 2011). Preisnan di horeca a bira 4,2 porshento mas karu den promé kuartal den promé kuartal na komparashon ku un aña promé, i den último kuartal di 2011, 11,4 porshento.
Bahada drástiko di inflashon na St.-Eustatius
Den e promé kuartal di 2012, inflashon na St.-Eustatius tabata 6,6 porshento. Den e di kuater kuartal di 2011, ainda inflashon tabata na 10,9 porshento. E bahada di inflashon tabata debí prinsipalmente na e echo ku preis di transporte, horeca i kuminda a subi na un manera hopi mas moderá. Preisnan di energia a yuda hisa e sifra di inflashon. Den e promé kuartal, energia tabata supstansialmente mas karu ku un aña promé, prinsipalmente debí na subida di preis di koriente.
Bahada leve di inflashon na Saba
Na Saba, den promé kuartal di 2012, inflashon a kaba na 5,7 porshento. Den e di kuater kuartal, ainda e tabata na 7,4 porshento. Meskos ku riba e otro dos islanan, e bahada di inflashon den promé kuartal di 2012 tabata debí na un subida ménos fuerte di preis na komparashon ku e di kuater kuartal di 2011. Den promé kuartal di 2012, ainda preisnan di horeca, kuminda i transporte tabata mas haltu ku un aña promé sí. Den e último kuartal di 2011 sí e subida di preis tabata basta mas haltu. Sinembargo, na 2012 koriente tabata supstansialmente mas karu na komparashon ku un aña promé i a yuda subi e sifra di inflashon.
